《電影雙周刊》    第225期    1987年10月29日

如花如我本無關

《胭脂扣》與梅艷芳

        梅艷芳一直不明白《胭脂扣》的如花怎樣會找上她？只是李碧華成書之後，如花一角就虛位以待，等待梅艷芳出現，隨即謀媒下聘。事實如此，《胭脂扣》自去年嚷著開怕以來，導演至演員的名單不知變換凡幾，唐基明去後是關錦鵬，十二少一角由鄭少秋至周潤發到張國榮，朱寶意替代鍾楚紅，還有萬梓良......只有梅艷芳演如花，始終不變。

李、關拔刀相助

        如花命如紙薄，去世時二十三歲。三十年代的塘西妓女，長於煙花之地，脂粉叢中。天生顏色素白，死後呈半透明狀態，淒淒怨怨地、上穹碧落下黃泉地尋夫。對於一向潑脫無拘繫的梅艷芳，她怎樣處理這個角色？

        「第一我好早的時候看過這本小說，然後晚晚捕住睇電視粵語長片，其實好多粵語片橋段和她很相似。學他們講o野、行路的姿態、神氣。拍第一場戲最辛苦，完全憑空想像。有些對白像什麼「溫心老契」、「埋街食井水」，根本不明白它的意思，怎會講得有感情呢！所以，一有唔明白就捉住李碧華來問。」

        「導演怎樣幫助你演繹角色？」

        「關錦鵬教戲很有心機，但係部戲o既女主角太多內心戲，阿關很詳細解釋每節戲，『勒！(學關口吻)個女主角初時係咁，後來就咁......』我問：『究竟中間係點哩！』唉，講o左等於無講？不過阿關和李碧華都同我討論過女主角o既心理和動機，上半場和下半場的心埋變化，點解上o黎，後來點解動殺機等等。」她停了一會又補充。

        「其實我只是盡量Natural咁去做，講得太多，有時仲走埋一邊o忝！」

        「如花是一個風塵女子，你自細出來唱歌，經歷咁多，是否容易把握這種人的心態？」

        「無呀？我以前唱歌，根本不同圈子，點會識這些人。就算見過，都唔係三十年代o個種啦！」

做鬼不要飛來飛去

        有一次，何冠昌問梅艷芳，既然《胭脂扣》是鬼片，不如加些飛來飛去的動作，會更吸引觀眾。她一口拒絕向何冠昌說：「做人同做事都係得兩種唧，一係為錢，一係為名。無兩全其美o既，有幾多《英雄本色》呀，我唔想破壞成個故事。搞咁多古靈精怪，我寧願唔拍。成龍講得o岩！我呢隻鬼有鬼o既邏輯，比較有人性，唔會無端端隱形，穿過厚牆。所以，我好麻煩o架，嘉禾D人見到我就頭痛，終於何冠昌被我說服，我地今次唔講商業，就講藝術。」

        「因此你對《胭脂扣》期望特別大，你好似好想得金馬獎。」

        「係呀！得獎是對自己一種交待。雖然，得獎未必可以加片酬，但係，得到獎表示人地一致公認你對電影有貢獻。你就算好紅，未必得到獎o架。」

        「其實你做o野對自己交待多還是對人交待多？」

        「對人交待多，如果對自己交待，我做完自己好玩果D就走人，駛乜咁辛苦。」

        「今次演《胭脂扣》，你由頭帶到尾佔戲咁重，在港產片女主角多數是花瓶，這種情況比較少見，算是你從影以來最大的挑戰？」

        「是呀！我又唔靚，香港靚女由一數到十未輪到我，由尾數上我排第一，又唔剝得，無謂搵我做花瓶。而家流行喜劇，我怕被人定型做o左女丑生。我希望做一個同現實生活完全唔同o既角色，咁至好玩。如花呢個角色，又斯文，講o野又細聲，行步路都要諗過，我平時大顛大肺，坐唔定，口唔停，不過，後期我都總算投入，或者我同情個女主角。」

如花、自己

        「你覺得如花是個怎樣的女人？」

        「她是個痴情而略為自私的人。以前D女人係咁慘，想唔通就大家攬住死。現代人唔會o架，好似萬子與朱寶意果對，有乜o野就開心見誠講，Easy Come Easy Go嘛。」

        「你認為自己是個怎樣的人？」

        「我個人好自我咯！自細包拗頸。阿媽叫我坐我就企，如果拿住籐條叫我食飯我偏偏唔食，你惡死對我，我就搗亂。」

        不過，這些都是很久以前的事。她最近看透了許多，尤其看透了自己，知道自己的不足，也不像從前野心勃勃，要打入日本市場，打入世界市場。她說不相信有人會唱到識飛，事實自己就飛唔起。

        「我以前脾氣好大，放o左收唔番好容易得罪人，寧願第日同人道歉至算。情緒波動又大，一個鐘頭喜怒哀樂可以做齊。自己個樣又衰，初出道果陣唔識人，唔敢出聲，人地話我扮Cool，招積。而家怕人話，總之一坐低就『辟哩巴啦』！亂講一通，點知仲弊，有時唔出聲，人地又話我唔開心。大佬，成日講，個口都會倦，要休息o架！」

        梅艷芳其實是天生的喜劇人才，說話不單有戲劇性，用字高度形象化，肯自嘲，一揚一頓，非常有Timing。不過，她似乎對喜劇有種抗拒感，她以為人家找她拍喜劇不過是她肯「烏where」，實在是驚人地直言！其實喜劇也可以演得很有深度，像許冠文。

        「拍《神探朱古力》的時候，許冠文要求很嚴格，一場戲排好多次好熟至拍攝，佢成日叫我誇張但要自然，自然得o黎又要誇張，又講好多o野俾我聽，不過唔係做戲，係關於人生，好深奧，我都唔知佢Up乜。」

        梅艷芳對於如花一角下了不少功夫。起碼她會看過劇本。她說以前拍戲，從來不看劇本，導演叫埋位，講一次對白，照Up。「喜劇嘛，都唔駛演技，做番自己之嘛，實做得好o架。」

想做一個魔女

        「你比較喜歡舞台？」

        「我鍾意唱歌，又鍾意電影。因為我以歌入呢個圈，我當然關心唱歌多D。其實每次唱歌，我都加很多戲劇性入去，每首歌都像演繹一個故事。我喜歡舞台，它可以讓我盡情表演發揮。以前唱夜總會，我隻隻歌都度過點唱，o係台上面飛來飛去，人地以為我『痴』o左，咁落力。」

        「但係不是隻隻歌你都鍾意？」

        「一隻碟都有兩三隻o既！又唔好咁悲觀。就算人地台下點自己唔鍾意唱o既歌！我都盡力做好，既然企得出o黎，就唔想苦口苦臉做得唔開心。」

        「最近你隻碟o既形象無刻意求變，唔似你追求百變o既風格？」

        「我今次諗o左個形象，仲犀利過妖女，叫做『魔』！我想講一個女人，佢係魔，係一種捉摸不定 o既o野！講魔由心生，人內心有天使和魔鬼，一時令到你好Down，冇晒信心，想自殺，完全係自己幻像。我講俾D填詞人聽，點知個個填返o黎都係講我！乜o野〈百變〉，〈妄想〉全部講我D o野！我話唔係講我，係講人地，點知聽唔明，冇辦法。」

        「你不如自己試下填？」

        「我識講，唔識做，填詞好難o架！終於隻碟變o左個淑女形象o忝。」

        梅艷芳時刻都想改變形象，因為怕悶，她自己想塑造的，人家辦不到。別人叫她演的，她又不想。她不明白為什麼要她做一個「慘」的角色！我不像嘛！事有湊巧，梅艷芳憑苦口苦臉在《緣份》中奪得香港金像獎最佳新人獎，第一次拍電視劇《香江花月夜》亦是慘慘戚戚的，到如今又想演活《胭脂扣》如幽如怨的如花問鼎金馬獎。她自問「我個樣係唔係咁慘？」

        一九八二梅艷芳第一次上台領獎，一身錯金縷體的風風光光，但，早熟和太濃郁的嗓子令她洗脫不了天涯歌女的形象，直至〈似水流年〉，大家都認為她比同齡的人走遠很多的路，因此可以滄桑得恰到好處。如今，她樂觀自恃，懷抱不拘，又像已順利越過了滄桑到另一光景吧！

文：林超榮

﹝返回我的阿梅一席話首頁﹞